“Tarix qa’rida ikki yulduz” nomli bayram tadbiri tashkil etildi

Maktabgacha va maktab ta’limi vazirligi huzuridagi Ixtisoslashtirilgan ta’lim muassasalari agentligi tomonidan Alisher Navoiy tavalludining 582 yilligi va Zahiriddin Muhammad Bobur tavalludining 540 yilligiga bagishlab Tarix qarida ikki yulduz nomli bayram tadbiri tashkil etildi.

Unda vazir Hilola Umarova ham ishtirok etdi:

-  Ajdodlarimizni bilish, ularni o‘rganish o‘tmishimizga va bugunimizga bo‘lgan ehtirom hissini yanada oshiradi. Bugun taraqqiyotning yangi bosqichiga qadam qo‘yib, Uchinchi Renessans poydevorini yaratayotgan bir pallada Alisher Navoiy va Zahiriddin Muhammad Boburning adabiy merosi misolida o‘zbek adabiyoti va madaniyatini chuqur o‘rganish har qachongidan ham muhim ahamiyat kasb etadi.

Ixtisoslashtirilgan ta’lim muassasalari agentligi tizimidagi maktablar hamda maktabgacha ta’lim tashkilotlari tarbiyalanuvchilari tomonidan tayyorlangan badiiy chiqishlar tadbir mehmonlariga alohida kayfiyat baxsh etdi.

Shuningdek, tadbir doirasida Navoiy va Bobur davrini o‘zida aks ettirgan cholg‘u asboblari, hunarmandchilik namunalari ko‘rgazmasi ham namoyish etildi.

Ko‘rgazmada, shuningdek  eski va zamonaviy maktabda ta’lim olish jarayonlari ham sahnalashtirilganligi mehmonlarda katta tаassurot qoldirdi.